اتخبطت يا حلو؟...تستاااااااااااهل

مش انا قلتلك بطل تتخبط بقى ؟
اهى دى تالت خبطة اهو

اه نسيت ولا ايه ؟
فاكر الوقعة اللى من على السرير ؟
فاكر صرخت ازاى ووقعت قلبى وقعدت ساعة بعدها مش عارفة اتلم على اعصابى

ولا فاكر تانى واقعة لما كنا عند تيتة ؟
ايه لحقت تنسى
وقعدت تعيط وعملتلى فيها عيل والدموع غرقت وشك

قلتلك ساعتها انت اللى غلطان
وقلتلى خلاص ياماما مش هعمل شقاوة تانى

تقوم تيجى النهاردة وتروح واقع براسك على الارض
وايه تبصلى وتقولى الحقينى
وهو انا اللى قلتلك تقعد على الارض وتتمرجح يمين وشمال؟
تستاااااااااااااااااهل

طيب خلاص ما تزعلش
حقك عليا
ده والله الدمعة منك بتاخد روحى معاها

بس التالته تابتة بقى كفاية كده عليك
هو انت فيك ايه اصلا عشان تقع كمان

ومايقع الا الشاطر